ހޫނު މޫސުމުގައި ފެނަށްޖެހޭ ރަށްތަކަށް ފެން ފޯރުކޮށްދިނުމަށް ފާއިތުވި 15 އަހަރު ދުވަހުގެ ތެރޭގައި 60 މިލިއަނަށްވުރެ ގިނަ ރުފިޔާ ހޭދަވެފައިވާއިރު، 2014 ވަނަ އަހަރުން 2019 ވަނަ އަހަރަށް ޖުމުލަ 40,696,771 (ސާޅީސް މިލިއަން ހަ ސަތޭކަ ނުވަދިހަ ހަ ހާސް ހަތްސަތޭކަ ހަތްދިހަ އެކެއް) ރުފިޔާ މިކަމަށް ޚަރަދުވެފައި ވެއެވެ. ފެން ފޯރުކޮށްދިނުމަށް ކޮށްފައިވާ ޚަރަދުގެ ތެރެއިން ބޮޑު އިންސައްތައެއް ފެން ފޯރުކޮށްދިނުމަށްކުރާ ދަތުރުތަކަށް ހޭދަވެ، ފެން ފޯރުކޮށްދިނުމުގެ ޚަރަދު އެތައް ގުނައެއް ބޮޑުވެފައިވެއެވެ. އެހެންކަމުން، ފެން ފޯރުކޮށްދިނުމަށް މިހާރު ބޭނުންކުރާ މޮޑެލް ދިރާސާކޮށް ފެން އުފުލުމަށް ހިނގާ ޚަރަދު ކުޑަވާނެ އެހެން އިންތިޒާމުތަކެއް ހޯދުމަކީ މުހިންމު ކަމެއްކަން ފާހަގަކުރަމެވެ. އަދި، ފެނަށްޖެހޭ ރަށްތަކުން އެދިފައިވާ މިންވަރަށް ފެން ފޯރުކޮށްދީފައި ވީނަމަވެސް، 2018 ވަނަ އަހަރުން 2020 ގެ ނިޔަލަށް ފެނަށް އެދި ހުށަހަޅާފައިވާ 81% ރިކުއެސްޓަށް އެއްބަސްވެފައިވާ މުއްދަތުގެ ތެރޭގައި ފެން ފޯރުކޮށްދެވިފައި ނުވެއެވެ. މިކަން މިހެން ދިމާވާ ސަބަބުތަކުގެ ތެރޭގައި، ފެން ހުސްވުމުގެ ކުރިން ބައެއް ކައުންސިލު އިދާރާތަކުން ފެނަށް އެދި ރިކުއެސްޓު ނުކުރުމާއި، ފެން މުޅިން ހުސްނުވަނީސް ފެނަށް އެދޭ ރަށްތަކަށްވުރެ، ފެން ހުސްވެފައިވާ ރަށްތަކަށް އިސްކަންދޭންޖެހުން ހިމެނެއެވެ.
ފެން ރައްކާކުރާ ނިޒާމު ގާއިމުކޮށްފައިވާ 47 ރަށުގެ ތެރެއިން 33 ރަށަކަށް ހޫނު މޫސުމާއި ގުޅިގެން ފެން ފޯރުކޮށްދީފައިވާކަން ފާހަގަކުރަމެވެ. މިހެން ދިމާވެފައިވަނީ، މި ރަށްރަށުގައި މި ނިޒާމް ގާއިމުކުރުމުގައި ފެނުގެ ޑިމާންޑަށް ރިއާޔަތް ކޮށްފައިނުވުމާއި ފެން ތާންގިތައް ސާފުކޮށް ވާރޭފެން ނެގުމަށް ތައްޔާރުކޮށްފައި ނުވުމާއި ފެން ރައްކާކުރާ ނިޒާމު ސާފުކޮށް ބެލެހެއްޓުމުގެ ހަރުދަނާ އުސޫލެއް މިނިސްޓްރީ އޮފް އެންވަޔަރަންމަންޓާއި ކައުންސިލު އިދާރާތަކާ ދެމެދު އެކުލަވާލެވިފައި ނުވުމުގެ ސަބަބުންނެވެ. މިހެންވުމުގެ ސަބަބުން، ވާރޭފެން ރައްކާކުރާ ނިޒާމު ގާއިމުކުރުމަށް ހިންގުނު މަޝްރޫއުތަކުގެ ނަތީޖާ އެންމެ އެދެވޭގޮތުގައި ހާސިލުވެފައި ނުވާކަން ފާހަގަކުރަމެވެ.
ހޫނު މޫސުމުގެ އަސަރު ރާއްޖޭގެ ދެކުނުގެ އަތޮޅުތަކަށްވުރެ ބޮޑަށް އުތުރުގެ އަތޮޅުތަކަށް ކުރަމުންދާކަމާއި، ވޭތުވެ ދިޔަ އަހަރުތަކުގައި ފެން ފޯރުކޮށްދީފައިވާ ރަށްތަކުގެ ނިސްބަތުން %55 އުތުރުގެ އަތޮޅުތަކުގެ ރަށްތައް ހިމެނިފައިވާކަމާއި 2021 ވަނަ އަހަރުގެ ނިޔަލަށް ފެނުގެ މައްސަލަ ހައްލުކުރުމުގެ ގޮތުން ފެނުގެ ވިއުގަ 43 ރަށެއްގައި ސަރުކާރުން ގާއިމްކޮށްފައިވާއިރު ހުރިހާ ރަށެއްގައި މި މަޝްރޫއުގެ މަސައްކަތް ކުރިއަށްދާކަން ފާހަގަކުރެވުނެވެ. ނަމަވެސް، ފެނަށް ޖެހުމުގެ މައްސަލައަށް ދާއިމީ ހައްލެއް ގެނެސްދެވިފައިވަނީ ފެނުގެ ވިއުގަ ގާއިމުކޮށްފައިވާ ރަށްރަށުގައި ކަމުގައިވާއިރު، ފެނުގެ ވިއުގަ ގާއިމުކޮށްދިނުމުގައި އެންމެ ބޮޑު އަހައްމިއްޔަތުކަމެއް ތަކުރާރުކޮށް ފެން ފޯރުކޮށްދޭ ރަށްރަށަށް ދެވިފައިނުވުމުގެ ސަބަބުން، މިރަށްރަށަށް އެކަށީގެންވާ ހައްލެއް ނުލިބި ގިނަ ދުވަސްތަކެއްވެފައިވާކަން ފާހަގަކުރަމެވެ.